قصة الحب : خيانة غير مغفورة ( الجزء الثاني ) .

يسعدنا في موقع القصة  إن نقدم لكم جديد القصص بكافة أنواعها ( قصص واقعية, قصص دينية , قصص الأنبياء ,قصص إسلامية , قصص كليلة ودمنة ,قصص ألف ليلة وليلة , قصص الحب, قصص الفراق, قصص سياسية , قصص النساء , قصص رومنسية , القصص البوليسية, القصة القصيرة,قصص خيانة , قصص وعبر , والعديد من القصص المتميزة والشيقة والرائعة , واليوم نقدم لكم  قصة جديدة بعنوان ”قصة الحب : خيانة غير مغفورة  ( الجزء الثاني ) .” وهي من القصص الشيقة والرائعة وتحمل الكثير من الحكم والعبر.

******

السابق :  قصة الحب : خيانة غير مغفورة  ( الجزء الأول).

من تاني يوم رحت وحطيت جوجو بحضانة ورجعت لشغلي ... كنت كل ما احاول اشوف خالد يعمل حالو مشغول ... وبالبيت يروح وينام ... ما بعرف شو اللي قلبو فجاة ... قررت اعملو اشي حلو يقربنا من بعض ... ومن الصبح رحت عمحل ورد شريتلو باقة .... ورحت للشركة ... وبهداك اليوم فتحت الباب بدون ما ادق ... لاقيت ديما قاعدة على حفة المكتب وخالد قبالها وبيضحكو ... نزلت ديما اول ما شافتني

- ديما : هلا حلول ... كيفكك

- خالد : حلا ... لمين هالوردات الحلوين ؟

- حلا : لامي بدي اروح اطلع عليها

وسحبت حالي وطلعت بسرعة .... بلش الشيطان يلعب براسي ... وانا اقنع حالي انو مستحيل في اشي ... ديما متل اختي ... كبيت باقة الورد وطلعت تمشيت وغيرت جو ...

وضليت احاول اتقرب من خالد ... ما خليت طريقة ... عالفاضي ... انا بقرب خطوة وهو برجع عشرة ... صرنا متل المغناطيس والخشبة ...

طيب وين راح الحب ؟؟ وين ايامنا الحلوة ؟؟

وبيوم وانا بالشغل رنلي رقم غريب

- حلا : الو

- مجهول : مدام حلا ؟

- حلا : ايوا تفضل

-مجهول : انتي طيبة ومسكينة ... وجوزك قاعد بخون فيكي ... حرام عليه

- حلا : اخرس شو بتحكي انت

- مجهول : ما تصدقيني بس روحي عالفندق اللي ورا الشركة ... وعغرفة 112

نفصل الخط ... وانا نار هبت جواتي .... طلعت بسرعة عند مكتب خالد ... اجيت ادخل الا السكرتيرة منعتني افوت ... دفشتها ودخلت .... لقيت المكتب فاضي ... دورت عليه بكل الشركة ما لقيتو ...

حملت حالي وطلعت متل المجانين وبوجهي عالفندق ... كان الف اشي براسي ... معقول الاقيه بخونني جد ؟

وصلت باب الغرفة وانا بدعي ربي انو يكون الحكي غلط ... وانو ما الاقي خالد ...

كنت كتير متوترة ... اخدت نفس عميق ... ودقيت الباب

وللاسف خالد فتحلي الباب ... رغرغو عيوني ... كان لابس روب حمام وعخدو في بوسة بالحومرة وبيضحك... بس اول ما شافني ... نقلبت ملامحو وصفن فيي

- خالد : حلا !!

- حلا : اه حلا ... مفكرني هبلة ما راح اكشفك ؟؟

دفشتو بايدي ودخلت ... عشان اشوف مين هالبنت اللي احسن مني ؟ مين هالبنت اللي باعني انا وبنتو مشانها  ... ويا ريتني ما دخلت

كانت ديما ... هه

ديما اختي وصاحبتي ... لابسة لبس شبه عاري والجو رومنسي

- ديما : حلا ؟؟؟

- حلا : تفووو عليكي وعليه ... خونة

طلعت من الغرفة وانا مشمئزة منهم لحقني خالد وحاول يهديني ويحكي معي بسس انا رفضت

((( يا الله شو صعب شعور الخيانة ... شو صعبة انكك تكتشفي انو الشخص اللي بتحبيه وبتموتي فيه ... بخونكك شعور بيشبه الموت ... اشي بيقتل .. الله لا يدوقو لحد )))

طيب انا بشو قصرت ؟؟  شو عملت مشان يخونني .. ومع مين مع صاحبتي اللي متل اختي ... اخخ يا دنيا

ركبت سيارت ورحت عند امي وانا ببكي .. ومش حاملة حالي ... ضليت اعيط بالساعات..

سمعت صوت احمد روح من الجامعة ... مسحت دموعي بسرعة

- احمد : حبيبتي حلا .. كيفكك .. وين جوجو عنكك ؟

بتسمتلو ودخل جوا ياخد دوش .. اول ما راح

- حلا : امي ..جوجو وين ؟ ماجابوها الحضانة ؟؟

- ام احمد : لا امي

صرت متل المجانين .. واتصلت بالحضانة بسرعة ... وخبروني انو خالد اجا اخدها

صرت ارن على خالد وما يرد ...مسكني من ايدي اللي بتوجعني .. بنتي

اجا خالد تاني يوم وطلب يقعد معي ... صحيح بعدني بحبو بس مو طايقتو ... بس طلعت اشوف شو بدو

واول ما شافني قرب مني .... مسكتو من قبة قميصو وصرت اشد في وابكي

- حلا : انت كيف عملت هيك ؟؟ كيف اجاك قلب تخونني ؟؟ وكك انت شو حجر  ؟؟ ... بكرهكك

- خالد : حلا سامحيني بترجاكي

.. والله الشيطان وسوسلي ... ما راح اعيدها سامحيني

- حلا : جنى وين ؟؟ بدي ياها

- خالد : جنى ما في تشوفيها  الا ازا رجعتي معي عالبيت

- حلا :  برجع بس طلع ديما من الشركة

- خالد : حاضر

اتطريت ارجع معو مشان بنتي مو مشانو ...مع انو جرحي كان كبير وعميق ... دعست عقلبي مشان بنتي ... ولاني بحبو لخالد ..

رجعتلو بس ما كنت طايقتو ... وكنت انام بغرفة بنتي ...وهو يحاول يصلح الوضع .. وقلبي بلش يحن عليه .. ورجعنا نتقرب من بعض ... وامورنا تتحسن

.....

وبيوم تعبت بالشغل وقررت اروح ارتاح ... وصلت البيت قعدت عالكنباي شوي .... بعدين رحت عغرفتي بدي انام  ... وقبل ما افتح باب الغرفة سمعت ضحكة بنت !!

فتحت الباب بقوة ... لقيت خالد وديما بوضع مخل للادب ..حملت حالي وطلعت من الغرفة بكل هدوء ... سكرت عليهم الباب بالمفتاح واتصلت بشرطة الاداب ... واستخدمت المحضر لصالحي  بالمحكمة ... طلقوني منو واعطوني بنتي

صحيح هاي تاني مرة .. بس كان وجعها اكبر من اللي قبلها ... خاول خاد يرجعني بس انا رفضت ... خيانتو هالمرة  كانت خيانة غير مغفورة ...تجاوزت جرحي ... وما وقفت حياتي عند خيانة خالد  ... بالعكس فتحت شركة انا واحمد اخوي والحمدلله شركتنا ناجحة والنا اسمنا بالسوق ... وبربي ببنتي وبخليها كل اسبوع تقضي يوم عند ابوها

بس بتعرفو برغم خيانتو  و خذلانو الي ... لهلا بحبو متل اول يوم  ..

النهاية
إسراء عزام

شارك الموضوع إذا أعجبك

share

Unknown